«Այսօր Հայաստանում գոյություն ունի չինովնիկների ամենաթողություն»,– «Հայելի» ակումբում այսօր կայացած մամուլի ասուլիսի ժամանակ հայտարարել է Մարդու իրավունքների պաշտպան Արմեն Հարությունյանն ու ավելացրել, որ պետական այրերի այդ ամենաթողությունից Հայաստանի քաղաքացիները պաշտպանված չեն, ու պետք է վերջ դրվի այդ երևույթին։ «Ես ահազանգ եմ հնչեցնում»,– իր մտահոգության վերաբերյալ ասել է ՄԻ Պաշտպանը։

Չինովնիկների ապօրինությունների ու ամենաթողության արդյունքն է հավանաբար այն, որ այս տարվա առաջին 6 ամիսներին ՄԻՊ գրասենյակ ստացված բողոքները ահռելի չափով մեծ քանակ են կազմել։ Ըստ Արմեն Հարությունյանի ներկայացրած տվյալների՝ նախորդ տարվա առաջին 6 ամիսներին ՄԻՊ գրասենյակը ստացել է 1768 դիմում–բողոք, մինչդեռ 2009 թ. առաջին վեց ամիսներին դրանք ավելացել են 1833–ով։

Մեր երկրի քաղաքացիները, ըստ Պաշտպանի, առաջինը դժգոհում են ոստիկանությունից, հետո կրթության և գիտության նախարարությունից, ապա քաղաքապետարանից, դատարաններից, աշխատանքի և սոցիալական հարցերի նախարարությունից։ Ներկայացնելով «թոփ հնգյակը»՝ Արմեն Հարությունյանը զարմանք է արտահատել կրթության և գիտության նախարարության կապակցությամբ՝ նշելով, որ այս ոլորտից դժգոհություններն անչափ շատացել են ու կապված են կառավարման նոր համակարգի ներդրման հետ։