«Թե հայ, թե ադրբեջանցի հասարակությունները, վստահորեն կարելի է ենթադրել, պատրաստ չեն որևէ փոխզիջումային տարբերակի»,- այսօր լրագրողների հետ հանդիպման ժամանակ հայտարարել է Քաղաքական զարգացումների հետազոտական կենտրոնի ղեկավար Վահան Դիլանյանը, ում ղեկավարած կենտրոնն ինտերնետային հարցում է անցկացրել՝ պարզելու, թե որքանով են Հայաստանի և ԼՂ-ի համար ընդունելի Մադրիդյան սկզբունքները:
Շարունակելով՝ նա նշել է, թե մինչ այս պահը երկու երկրների նախագահներին էլ ձեռնտու էր հարցի չլուծումն ու ստատուս քվոյի պահպանումը, սակայն հիմա իրավիճակը փոխվել է: Դիլանյանի կարծիքով` այժմ Հայաստանի և Ադրբեջանի նախագահներն ընտրության առաջ են՝ կամ պետք է մերժեն ղարաբաղյան հակամարտության կարգավորման Մադրիդյան փաստաթուղթը՝ դեմ չգնալով իրենց հասարակություններին, ու պահպանեն ստատուս քվոն, կամ էլ ՝ պետք է ընտրեն բարեկեցիկ ապագան՝ փոխվստահության մթնոլորտում ապրելով:
Փորձագետը, սակայն, նկատել է, որ այսօր երկու երկրների միջև կա խորը անվստահություն: